Contabilidade que sae do que xa apuntaches

Isto non substitúe a túa asesoría

Convén dicilo cedo, porque é a dúbida que aparece sempre. Cairos non substitúe un asesor fiscal: dálle os números cadrados e a tempo, que é o que a un asesor lle fai falta para facer ben o seu traballo.

O que si desaparece é o correo de cada trimestre cun Excel anexo e unha carpeta de fotos de tíckets. A asesoría entra, mira e traballa sobre datos que xa están no seu sitio. De feito, moitas asesorías úsano cos seus clientes precisamente por iso.

A prorrata, sen misterio

Se parte do que facturas está exento de IVE —unha consulta sanitaria, unha academia, un alugueiro de vivenda— non podes deducir enteiro o IVE dos teus gastos. Aí entra a prorrata, e hai dúas, non unha.

A prorrata xeral é unha porcentaxe única que se aplica a todo o IVE soportado. Sae de dividir o que facturas con dereito a dedución entre o total do que facturas, e redondéase sempre á unidade superior: un 19,2 % é un 20 %. Do cálculo quedan fóra as vendas dos teus propios bens de investimento e as operacións inmobiliarias ou financeiras que non sexan a túa actividade habitual, así que vender a furgoneta non che estraga a porcentaxe.

A prorrata especial afina: deduce ao 100 % o IVE do que usas só na parte suxeita, non deduce nada do que usas só na exenta, e deixa a porcentaxe unicamente para os gastos comúns. Pódese optar por ela na última declaración do ano —e entón vincula tres anos naturais—, pero ademais é obrigatoria cando a xeral che daría un 10 % máis de dedución ou máis do que resultaría coa especial. Ese limiar baixou do 20 % ao 10 % en 2015 e aínda hai material circulando co número vello.

Durante o ano non se usa a porcentaxe do ano en curso, senón a definitiva do ano anterior. A definitiva calcúlase na última autoliquidación do exercicio, e aí regularízanse de golpe as deducións provisionais dos catro trimestres.

Á parte vai a regularización de bens de investimento: os bens de 3.005,06 € ou máis séguense durante os catro anos seguintes ao da compra, ou nove se son terreos ou edificacións. E só se axusta se a prorrata dun ano difire en máis de dez puntos da do ano en que deduciches o IVE. Por debaixo diso, non se toca nada.

O peche do exercicio

Pechar un exercicio non é premer un botón: é comprobar que non queda nada solto. Cairos fai as comprobacións que se esquecen cando se fai a man.

• Facturas emitidas sen cobrar e gastos sen pagar, coa súa antigüidade.
• Amortizacións do ano pendentes de dotar.
• Regularización da prorrata e dos bens de investimento.
• Documentos en borrador que nunca chegaron a emitirse.
• E o cadre entre os catro modelos 303 e o 390 antes de presentalo.

Unha vez pechado, o exercicio queda bloqueado: non se poden meter apuntamentos con data anterior sen abrilo expresamente. É o que evita que un asento de hai dous anos cambie unha declaración xa presentada.